Allt að verða vitlaust hérna

Það er nú meira hvað veislur og skemmtanir geta hlaðist á mann á stuttum tíma.  Stundum sér maður ekki hræðu, eða fer nokkurn skapaðan hlut, en svo koma tímabil þar sem að allar helgar eru þétt skipulagðar.  Framundan eru td, skemmtifundur í vinnunni með Jóni Gnarr, námskeið, reunion frá Laugum, Fyrsti vetrardagur, árshátíð í vinnunni og þetta er fyrir utan allt sem að ég er búin að ákveða að gera með krökkunum.  En þetta er nauðsynlegt í skammdeginu.   En talandi um reunion.....jibbý loksins loksins ætlum við skvísurnar að hittast.  Vá hef ekki séð sumar síðan á Laugum forðum daga.  Þetta verður æðislegt.  Ætlum að fara út að borða á Caruso og svo á ball með Sálinni á Nasa.

Krakkarnir fóru í sumarbústað með pabba sínum um helgina í Haukadalinn.  Það var rosa stuð hjá þeim og flugu sögurnar hérna í gær og í dag um hlaupandi hrúta í réttunum og aumingja Fanney öll orðin blá og marin eftir að draga í dilkana.  Finnst það nú bara gaman. 

Fanney er farin að æfa 4 sinnum í viku og er áhuginn alveg rosalega mikill hjá henni sem er frábært.  Hún finnur sig mjög vel í þessu.  Nýr þjálfari kom í haust og er hann að ná vel til hennar.  Kvartar stundum yfir að þau séu eitthvað hörð við þær En þær hafa nú bara gott af þessu.  Patrekur fylgdi henni í Risann í Kaplakrika í dag og þá sagðist hann ekkert ætla að æfa fótbolta með Haukum, það væri sko mikið flottara hús sem væri hjá FH.  Þannig að það er spurning hvað verður fyrir valinu. 

Vinnan er að virka rosalega vel.  Frábært samstarfsfólk, mjög fjölbreytt starf og ekki skemmir að geta labbað um og verslað föt á "spot pris" á fjölskylduna.  Fer nú að hlakka til að fá öll þessi frændsystkin sem eru á leiðinni svo að ég geti farið að versla þarna í ungbarnadeildinni.....hún er bara frábær. 

En jæja nóg í bili.....Magga

Byrjuð í nýju vinnunni:)

Jæja þá byrjaði dagurinn á því að mæta í vinnu á nýjum vinnustað.  Það var nú alveg ótrúlegt að ég svaf nánast ekkert í nótt, alltaf að vakna og kíkja á klukkuna.  Annaðhvort var ég svona stressuð yfir því að ég myndi mæta of seint eða svona mikil spenna.  Dagurinn var s.s bara mjög svo skemmtilegur.  Rúntaði í Njarðvík (Reykjanesbær heitir það víst) og svo bara að læra á tölvurnar og allt dæmið.  Líst ofsalega vel á þetta allt saman nema kannski hvað það er erfitt að komast í og úr vinnu....úffffff en ætla að gera tilraunir næstu daga hvaða leið er fljótlegast að fara.

patrekur örn......(Patrekur að æfa sig að skrifa á tölvunna)

Fanney og Helga eru að leika sér að teikna tattoo, er mest hrædd um að þær dragi mig í tattooveringu hérna...hehehe. 

Jæja ætla að halda áfram að skrifa smá hugsanir.....set þær inn seinna:)

kv Magga holtabúi

Endalausar skammir hérna!!!

Kannski ekkert skrýtið þar sem að það er greinilega bara bloggað á mánaðar fresti. 

Nú er allt að komast á skrið hjá okkur hérna holtabúunum...Fanney æfir stíft í boltanum og er svo að byrja í Sönglistinni á laugardaginn.  Það verður frábært hjá henni.  Patrekur er bara á fullu  í leikskólamálum og er svo stoltur af því að vera orðinn stórahópsdrengur og tekur því mjög alvarlega að vera að aðstoða litlu púkanna sem eru að byrja.  Svo á það nú til að gleymast þegar heim er komið að maður sé stilltur og allt það.....

Síðasti dagurinn í vinnunni hjá mér er á morgun.  Þá endar 6 ára starfsaldri mínum á leikskóla.  Verður nú örugglega skrýtið að vera ekki endalaust að hugga, snýta og skeina......en börnin mín fá að njóta þess í staðinn að fá alla mína athygli.   Byrja sem sagt sem sölumaður hjá Rún á mánudaginn.  Það verður spennandi að prufa eitthvað nýtt og vonandi að það verði bara gaman.  Hef fulla trú á því.   Annars endar minn ferill hjá leikskólanum mjög vel......fer nefnilega í óvissuferð á föstudaginn:)  ohhhh  það verður æðislegt.  Búin að redda mér kúrekahatti sem er "þemað" og svo keyptum við á deildinni allar eins klúta en vantar hugmyndir um hvernig við getum sett okkur allar (erum 6) í svona ákveðið þema saman......kannski bara young guns.......hehehe. Þetta  verður BARA stuð. 

kveðja í bili.....þarf að fara að baka fyrir morgundaginn.....heimta víst kökur í vinnunni....Magga

hehemmmm

Já veit það vel að ég er löt að skrifa.....bara mikið að gera.  Segjum það allavega.

En við Fanney vorum á Siglufirði um helgina þar sem fram fór pæjumót í fótbolta.  Ég var gripin sem fararstjóri með 5. flokknum hjá Haukunum ásamt 3 öðrum kjellum.  Þetta var alveg ofsalega gaman.  Mikið fjör að vera með 22, 11 og 12 ára stelpur í einni stofu.  En þeim gekk nú bara mjög vel öllum saman.  Mikið spilað á reyndar mjög svo blautum völlum, sérstaklega þeim sem hún Fanney lenti á......hann var bara drulla á miðjunni.  Svo voru þær auðvitað að fórna sér fyrir boltan sko,,,, og flugu stundum beint á hausinn í ökkladjúpri drullunni.  Enda vorum við í því að þvo og dusta drullu úr búningunum þeirra.  En þetta setti bara sinn svip á mótið og Siglfirðingar eiga hrós skilið fyrir frábærlega skipulagt mót.  Allt gekk eins og í sögu.  En það voru nú þreyttar mæðgur sem komu heim í gærkvöldi.  Enda löng keyrsla að baki og stanslaust fjör.

Svo fer nú að styttast í skólann hjá Fanneyju....var einmitt að skrá hana í Hvaleyrarskóla í morgun.  Hún er bara nokkuð spennt að byrja.  Enda segist hún greyið vera vön að skipta um skóla.  En skulum nú vona að hún fái frið til að vera þarna eitthvað.  Arnar fór og gerði stórinnkaup af skóladóti fyrir hana, sem kemur sér rosalega vel.  Svo fékk nú Patrekur "skólatösku" og bók frá honum og situr sko stjarfur við að æfa sig að skrifa stafi og fleira. 

En nú skal fara að taka upp úr töskum og þvo;)

ciao þar til síðar.  Magga

Frábær helgi

Jæja þá er helgin búin og vinnan bíður í fyrramálið. 

Fórum vestur og nutum þess vel.  Sátum nú bara í slökun yfir videó á föstudagskvöldið....fórum til Ingu og keyptum bara af henni mynd....og settum okkur í svaka stellingar....snakk og ídýfur í sófanum.  Svo var nú ákveðið að brjóta smá reglur...svona þar sem að mamma og pabbi voru ekki heima......og buðum honum Hómer að kíkja í sófann til okkar.  Það vildi nú ekki betur til en það að hann fékk greyið hálfa ídýfudós yfir sig allan.  Greyið....vorkenndum honum heilan helling. En hann var nú bara mjög sáttur sko...sleikti og sleikti...ummmmmm fannst þetta æðislegt og var því ekki alveg sáttur við okkur þegar við skelltum honum í sturtuna.

 Kíktum á Bikarmót vesturlands í hestaíþróttum og þar var verið að vígja nýjan reiðvöll í Búðardal.  Til hamingju Glaðsmenn með stórglæsilegan völl og aðstöðu í kringum hann.  Það var frábært að sjá það.  Svo er bara vonandi að ráðuneytið samþykki beiðnina okkar um að byggja reiðhöll.  Þá er þetta komið.  Ég kíkti svo aðeins með öllum gömlu kunningjunum út og það var nú svakalega gaman.....smá þreytt í dag....en ekkert sem jafnar sig ekki.  

Jæja...kveðjur úr Firðinum....Magga

Fríið að verða búið.

Jæja þá er nú þetta blessaða sumarfrí að verða búið.  Vinna á mánudag og þá byrjar rútínan aftur.  Erum fyrir vestan núna...mamma og pabbi fóru úr bænum og við komum til að halda félagsskap yfir Hómer.  Það er búið að vera nóg að gera síðustu daga.  Krakkarnir fóru í Þórsmörk um síðustu helgi með Arnari og Guðleifu.  Það var sko rosa gaman hjá þeim.  Fjallgöngur og læti.  Við skelltum okkur svo í keilu í vikunni.....það er alltaf jafn gaman.  Patrek fannst nú skemmtilegast þegar hann fékk fellu eða feykju.....er ansi góður sko.  Svo kíktum við í bíó.....og svo var toppurinn á vikunni gærkvöldið.....en þá fórum við Fanney og Helga með Kristínu og Sædísi á Footloose í Borgarleikhúsinu.   Mikið ofsalega var gaman.  Segi bara ekki annað.  Snilldar tónlist, söngur, leikur, svið, búningar og svo bara showið eins og það lagði sig.  Unnur Ösp á greinilega framtíðina fyrir sér í leikstjórninni.

En nú þarf að koma börnum niður og jafnvel fullorðnum líka.....þar til síðar.

kv Magga